Зошто ни се случи невремето?

Вчера бевме сведоци на големо невреме во Скопје и другите градови во нашата земја. Невремето остави видни последици по инфраструктурата и зеленилото во урбаните средини.

Зошто насред лето сме сведоци на вакви екстремни појави?

Невремето не беше обичен летен дожд – беше потсетник за новата реалност!

Оркански ветрови, град и силни поројни дождови што го зафатија градот се директна последица на зголемената нестабилност во атмосферата. Но, како ова е поврзано со климатските промени?

 Повеќе топлина = повеќе енергија:

Подолгите и поинтензивни топлински бранови го загреваат воздухот. Потоплиот воздух содржи повеќе влага (околу 7% повеќе за секој 1°C затоплување), што создава „гориво“ за многу посилни и поексплозивни бури.

 Временски екстреми:

Климатските промени го менуваат начинот на кој врне. Наместо умерени дождови, сè почесто се соочуваме со временски непогоди од типот – сушни и пеколно топли периоди заменети со ненадејни, разорни и моќни бури.

 Балканот како жариште:

Медитеранот и Балканот се меѓу регионите што се загреваат побрзо од глобалниот просек, правејќи ги ваквите екстремни појави сè зачестени.

Екстремните временски прилики веќе не се реткост, туку директен резултат на климатската криза.

Што е потребно?

Создавање отпорни градови каде инфраструктурата е прилагодена на вакви невремиња.

Потребно е градовите сериозно да го проценат ризикот од овие невремиња во иднина и во своите програми да предвидат и буџетираат активности за градење на отпорноста- не можеме да го промениме времето, но мораме да се прилагодиме за да го издржиме следниот ваков „удар“. Ова значи поголема контрола и повисоки стандарди за безбедност во градежништвото и урбаното уредивање.

Дополнително, зелените површини се заштитници на урбаните средини, но и потенцијален ризик за граѓаните при вакво невреме. Затоа е важно редовно и континуирано да се одржува зеленилото во градот, да се кастрат гранките и да се отстрануваат сувите делови од дрвјата, а паднатите дрвја веднаш да се заменат со нови. Градскиот парк мора редовно да се одржува и конечно да се ефектуира одлуката на Соиветот за замена на старите дрвја со нови садници!

На граѓаните мора да им се обезбеди навремена информација со предупредување за невремето, како и да им се понуди помош, особено во вакви ситуации и сите служби мора да бидат на терен веднаш по невреме од ваков размер.

Време е за поголема свест, подобри системи за предупредување и поотпорна градска инфраструктура! 🌍⚠️

#КлиматскиПромени #Скопје #ВременскиЕкстреми #ОколнаСредина