Свечено отворање на Трајната поставка за природа за Вевчанските извори

by Elena Nikolovska | Mar 22, 2024 | Еко-свест Вевчани, Настани, Објави, Области, Природа

Еко-свест во соработка со Општина Вевчани денес свечено ја отвори Трајната поставка за природа насловена “Патување низ природните богатства на Вевчански Извори”. Поставката се наоѓа во Мултикултурниот Центар Коста Србакоски во Вевчани и има за цел промоција на природните вредности на заштитеното подрачје Споменик на природа Вевчански Извори и планината Јабланица, преку едукација и подигнување на јавната свест.

„Трајната поставка ќе биде и еден вид на едукативен центар при посета на Вевчани од основните и средните училишта со цел спроведување на еднодневни екскурзии, како и за туристите, студентите и сите љубители на природата. Трајната поставка треба да претставува и наша определба за заштита не само на Споменикот на природа „Вевчански извори“ туку и на целата планина Јабланица.“

изјави Дарко Ќитаноски, локален проектен координатор на Еко-свест во Вевчани

Поставката изобилува со забавни и едукативни содржини за сите возрасти и е изработена на македонски и англиски јазик. Таа овозможува запознавање со природните вредности и реткости на подрачјето. Преку интерактивни игри кои се направени посебно за најмладите, поставката ќе даде извонредна можност за едукативни активности за основните училишта од регионот и пошироко. Во комбинација со едукативните активности во природа, како и акциите со граѓанска наука, оваа изложба го комплетира едукативното искуство и за средношколците и возрасните љубители на природата.

„Ги покануваме сите училишта, студенти, туристи и посетители да ја посетат трајната поставка и да уживаат во нејзините содржини. Имаме со што да се пофалиме и на што да се гордееме и тоа со радост го споделуваме, а сега и го овековечивме со оваа трајна изложба“.

додаде Наум Илиески, локален координатор на Еко-свест во Вевчани

На свеченото отворање беа присутни голем број чинители од заедницата, а на настанот се обрати Градоначалникот на Општина Вевчани г-н Спасе Кочовски и Извршната директорка на Еко-свест, г-а Ана Чоловиќ Лешоска. Свое обраќање имаше и директорката на Prespa Ohrid Nature Trust, г-а Mirjam de Koning, фондацијата која го поддржа креирањето на оваа трајна поставка.

Поставката е изработена и поставена од Еко-свест како дел од проектот “Поддршка на одржливо управување со Споменикот на природа Вевчански Извори” спроведуван од Еко-свест – финансиран од Prespa Ohrid Nature Trust – PONТ.

Цел на проектот е да се постигне долгорочна заштита на Споменикот на природата „Вевчански извори“ и просперитет на локалната заедница преку практики за одржливо управување со природните вредности на заштитеното подрачје. Со спроведувањето на овој проект работиме на подигнување на јавната свест преку едукација, подобрување на инфраструктурата за посетители, следење на клучни видови во подрачјето како и привлекување на повеќе посетители во подрачјето.

Отворен повик до младински организации за доставување на понуди за продукција и реализација на активности кои вклучуваат младинско учество

by Elena Nikolovska | Mar 22, 2024 | Објави, Повици

Центарот за истражување и информирање за животната средина „Еко-свест“ во рамки на проектот „БИТОЛА БЕЗ ЈАГЛЕН“ има потреба од продукција и реализација на низа активности кои вклучуваат младинско учество, кои реално ќе ги претстават еколошките проблеми од работата на термоцентралите на фосилни горива и ќе иницираат локална и национална дебата за иднината на регионот без употреба на јагленот.

Ангажираната страна ќе биде одговорна за развивање, продуцирање и изведба на активности со младинско учество од информативен, едукативен и уметнички карактер кои ќе придонесат за вклучување на млади во зголемување на свесноста за штетните последици од работењето на термоцентралите на фосилни горива по животот на луѓето и животната средина. Се предвидува да се изведат најмалку 2 (две) различни активности на најмалку 2 (две) различни локации на територијата на и околу Битолскиот регион. Периодот на имплементација е помеѓу 15 април и 31 јули 2024 година. Активностите кои ќе бидат предмет на продукција и реализација треба да биде копродукција помеѓу Еко-свест и ангажираната страна.

Краен рок за пријавување е среда, 3 април 2024 година, до 12:00 часот на електронската адреса: [email protected], со назнака: Пријава за активности кои вклучуваат младинско учество. Пристигнатите прашања од кој било од заинтересираните понудувачи ќе бидат одговорени и објавени на веб-страницата на Еко-свест под објавата за повикот. Пријавите кои ќе пристигнат по наведениот рок или без целосна документација, нема да бидат разгледувани.

Сите детали за повикот со критериуми за учество и избор се дадени во документот во прилог.