Скопје, 2 септември 2025 – Препознавајќи ја потребата за ефективно надминување на еколошките проблеми со кои се соочуваме, Еко-свест стави во функција „Зелен телефон“.
Овој сервис е достапен од средината на август – тоа е алатка за советување, насочување и правна поддршка на граѓаните кои се подготвени за акција. Преку Зелениот телефон граѓаните информираат за различни еколошки проблеми и дознаваат како може да се решат.
На кој број граѓаните може да пријават проблем?
Бројот на Зелениот телефон е 071-600-333.
Веднаш по пријавувањето, следи анализа на проблемот од страна на нашиот правен тим. Тој дава совети на граѓаните во врска со постапката за решавање, или самостојно доставува пријава/барање до надлежните институции. Преку Зелениот телефон може да се пријават прашања или проблеми од областа на урбаното живеење, отпадот, енергијата, воздухот, загадувањето на води, природата и слично.
„Добиваме пријави од цела Македонија во различни категории, како на пример загадување на водите, воздухот и проблеми со отпадот. Многу од граѓаните веќе самостојно презеле чекори за решавање на проблемите, но бараат и совет како да продолжат понатаму и која би била следната инстанца, доколку не успеале во нивните првични напори.
Само за две недели, на Зелениот телефон пристигнаа повеќе од 30 пријави од кои 17 се уредно поднесени од страна на граѓаните и се во постапка на решавање. Од сите пријави, пет се веќе решени. Најголем дел од пријавите се за отпад и нелегални депонии на територијата на целата држава. Загадување на водите и уништување на природата се на второ место.“ изјави Милијана Богданоска, еколошки правник во Еко-свест.
Целта на Еко-свест преку „Зелениот телефон“ е да развие континуиран однос на соработка и доверба помеѓу граѓаните и органите надлежни за решавање на еколошките проблеми. Истовремено ја подигнува и јавната свест за важноста од личен ангажман на граѓаните во откривањето и во пријавувањето, а со тоа и надминувањето на еколошките проблеми.
Повеќе информации на следниот линк.
Лице за контакт:
Милијана Богданоска, еколошки правник, [email protected]
Најнови коментари