Скопје, 14.10.2022 г. – Најновите истражувaња од експерти во соработка со Центарот за истражување и информирање за животната средина „Еко-свест“ покажуваат дека воспоставувањето на централно греење зависно од ТЕЦ Битола не е најисплатливото и најефикасно решение за граѓаните. Студијата којашто ги истражува алтернативите за индивидуално и централно греење за Битолскиот Регион, препорачува поврзување на фотоволтаични системи со инвертер клима уреди за индивидуални куќи и колективни згради коишто ќе овозможат поголеми заштеди на енергија и намалени трошоци за граѓаните.
Системот за централно греење кој е зависен од ТЕЦ Битола е повеќедецениски проект којшто сè уште не е спроведен заради несоодветно планирање. Анализите од студијата на Еко-свест и мрежата CEE Bankwatch Network сугерират дека достапноста на нови технологии базирани на обновливи извори го прават овој проект скапа и неисплатлива инвестиција.
„За да ја забрзаме енергетската транзиција и декарбонизацијата, мора да почнеме да имплементираме одржливи практики за домаќинставата преку воспоставување на системи за индивидуално и централно греење базирани на чиста енергија. Ваквите системи веќе се практикуваат во земјите од Европа и стануваат се поатрактивни бидејќи во тоа е иднината доколку сакаме да се стремиме кон независност и одржливост на енергетскиот систем. Сончевиот потенцијал кај нас е огромен и неговото искористување за загревање на домаќинствата претставува важен елемент за декарбонизација на регионите зависни од јаглен“ – потенцира Кристина Димитрова од Еко-свест.
Денес постојат алтернативи од поновите генерации на системи за греење кои се базираат на чиста енергија, а првичните наоди на Вања Џинлев, асистент и истражувач за енергетика при Федералниот институт за технологија во Цирих, препорачуваат искористување на потенцијалите од сончевата енергија за индивидуално и колективно загревање на домаќинствата во Битола.
„Анализата на алтернативите на планираното централно греење во Битола базирано на искористување на капацитетите на РЕК Битола покажува дека постои технолошко-економска исплатливост за употреба на други технологии во домаќинствата што ќе ги задоволат потребите за топлинска енергија. Прелиминарната анализа покажа дека индивидуални инвертер системи во комбинација со фотоволтаични системи, имајќи го во предвид моменталното ограничување на капацитетите на производители-потрошувачи (prosumer) и за физички и правни лица, е најсоодветната и најисплатливата опција за задоволување не само на топлинските потреби во домаќинствата, туку и на електричната енергија“, изјави Вања Џинлев, автор на истражувањето.
Ваквото прво практично применливо истражување од овој тип кое дава алтернативи на постоечките и планирани застарени технологии за загревање на домаќинствата во земјава. Дополнително, ова се решенија што може да се применат и стимулираат на краток рок, а позитивниот ефект врз енергетскиот систем, животната средина и здравјето на луѓето да е долготраен. Локалната и централната власт, доколку се посветени на декарбонизација на економијата и заштеда на енергијата, треба сериозно да ги разгледаат ваквите препораки и забрзано да ги применуваат за да се амортизираат негативните последици од енергетската криза.
На почетокот на ноември ќе биде објавена финалната студија со сите детали и можни сценарија за ваквата трансформација на системите за греење.
Центарот за истражување и информирање за животната средина “Еко-свест” од Скопје, во рамки на проектот „Поддршка на ефикасно управување со заштитеното подрачје Вевчански извори“, финансиран од ПОНТ има потреба од ангажирање на компанија или консултант коj ќе дизајнира информативни табли, знаци и промотивни материјали.
Цел на активноста
Цел на активноста е брендирање и дизајнирање на информативните табли и промотивните материјали во проектот “Поддршка на ефикасно управување со заштитеното подрачје Вевчански извори” кој Еко-свест го спроведува во Споменикот на природата „Вевчански извори“ во периодот меѓу 15 август 2022 и 15 август 2025 година.
Работни задачи и одговорности на компанијата/консултантот:
Концептуализација и изработка на брендинг за проектот;
Дизајнирање на најмногу 30 информативни табли и 30 знаци (патокази);
Дизајнирање на промотивни материјали (кратки брошури, летоци, упатства, карти, маички, беџови и сл).
Временска рамка и вредност на договорот
Вредноста на договорот не може да надмине 1500 евра во денарска противвредност (со вклучен ДДВ за правни лица или персонален данок за консултанти/физички лица).
Ангажанот не може да трае подолго од 1 јули 2025 година.
Критериуми за избор
Компанијата која ќе се пријави мора да ги исполнува следните критериуми:
Активна компанија која е формирана согласно Законите во Република Северна Македонија, и постои најмалку 2 години.
Потребна документација за аплицирање
За правни лица
Краток опис на компанијата;
Биографија од најмалку едно лице со искуство во дизајнирање кое би било ангажирано за активноста;
Портфолио;
Тековна состојба не постара од 6 месеци.
За физички лица
Лична биографија на консултантот (потребно е искуство во дизајнирање);
Портфолио;
Финансиска понуда.
Целокупната документација треба да биде доставена на македонски јазик во електронска форма.
Евалуација на кандидатите
Еко-свест ќе го извести само оној кандидат чија понуда ќе биде избрана. Договор ќе биде склучен со оној кандидат чија понуда ќе биде оценета како најповолна и чие портфолио/искуство ги задоволува потребите на повикот.
Пријавување
Комплетната понуда, апликантите треба да ја испратат на еmail: [email protected] најдоцна до 21.10.2022 г. до 16:00 часот, со назнака “Апликација за дизајн на информативни табли, знаци и промотивни материјали”.
Некомплетни понуди или понуди испратени по предвидениот рок нема да бидат земени во предвид.
Информации за проектот:
Име на проектот
„Поддршка на одржливо управување на Заштитеното подрачје Вевчански извори“
Времетраење на проектот
Времетраењето на проектот е 3 години, односно од 15.08.2022 до 15.08.2025.
Локација на проектот
Проектот ќе се реализира на подрачјето на заштитеното подрачје Споменик на природата “Вевчански Извори”, Општина Вевчани.
Кратко резиме на проектот
Еко-свест во наредните три години ќе го реализира проектот “Поддршка на одржливо управување на Заштитеното подрачје Вевчански извори”. Проектот е финансиран од Ohrid Prespa Nature Trust – PONT.
Проектот ќе се реализира на територијата на заштитеното подрачје Споменик на природата „Вевчански Извори“ во Општина Вевчани, а период на спроведување на проектот ќе биде од август 2022 до август 2025.
Целта на проектот е да се обезбеди поддршка за одржливо управување со заштитеното подрачје Споменикот на природата “Вевчански Извори”, а во исто време подобрување на еколошкото образование, вклученоста на граѓаните во мониторингот на видовите, како и одржување на важна инфраструктура за посетители.
Целите на проектот се:
Ефективното управување со посетителите и зачувување на биолошката разновидност при зголемен број на посетители во паркот;
Зачувување на статусот и ефективно следење на клучните видови во Споменикот на Природата “Вевчански извори”;
Вклучување на Еко-свест во ефикасно управување со Споменикот на природата.
Проектни активности:
Работа со училиштата за едукација на учениците и воспоставување на еко патрола.
Поставување на информативни табли и знаци и нивно редовно одржување.
Изработка на материјали за промоција на посетители.
Набавка и поставување на панорамски двоглед.
Промоција на заштитеното подрачје преку создавање на електронски материјали (објави и видеа).
Поставување на фото замки со цел мониторинг на животинскиот свет.
Организација на еколошки филмски вечери, јавни дебати, работилници, планинарења и посети за викенд, акции за чистење на отпад итн.
Скопје, 21.09.2022 – Заштитата на животната средина е глобален и комплексен предизвик којшто ги засега сите сегменти од животот на човекот, особено економскиот живот, што е и главната причина за сегашната состојба на животната средина. Балансирање на економските и социјалните влијанија врз животната средина, станува императив на јавните политики на современото општество. Оттука, развојот во 21-виот век треба да се заснова на рационално користење на природните ресурси, со минимални и реверзибилни штети врз животната средина.
Центарот за истражување и информирање за животната средина „Еко-свест“ од Скопје веќе две децении активно работи на одржливиот развој, заштитата на животната средина и поттикнување зелена трансформација во општеството.
Оваа есен, „Еко-свест“ во соработка со мрежата „CEE Bankwatch“, ќе објави две студии на тема „Анализа за алтернативи за централното греење базирано на јаглен за Битолскиот Регион“ и „Данок на јаглерод“.
Податоците од овие студии очекуваме да поттикнат поголема вклученост на граѓаните во донесувањето на одлуки поврзани со начините на загревање во домаќинствата, но, и да се информираат за алтернативите кои би го подобриле нивниот квалитет на живот, а би ги подобриле и состојбите во животната средина.
Енергетската ефикасност е процес на намалување на потрошувачката на сите видови енергија додека се подобрува квалитетот на живот, што значи трошење помалку енергија за иста количина на производи или услуги.
Така на пример, можете да земете класична сијалица, која најголем дел од електричната енергија којашто ја користи ја претвора во топлина, иако нејзината главна цел е да ја претвори електричната енергија во светлина. Затоа, класичната сијалица е енергетски неефикасна, за разлика од новите генерации на „штедливи светилки“, кои поголемиот дел од електричната енергија што ја трошат ја претвораат во светлина.
Доколку, пак, електричната енергија која ја трошат доаѓа од одржливо искористени обновливи извори, како што се сонцето или ветерот, тогаш енергијата која ја користи таа светилка истовремено е најмалку штетна за животната средина и здравјето на луѓето.
На истиот овој начин, преку инвестирање во одржливи начини на греење како што се инвертер климите, особено со нивно комбинирање со кровни соларни панели со кои се обезбедува енергија за нивното работење, се создава еден исклучително ефикасен систем за загревање на домаќинствата кој носи големи заштеди на долг рок. Придобивките од ваквите системи може повеќекратно да се зголемат со здружување на неколку домаќинства во таканаречени енергетски заедници каде што со заедничка инвестиција ќе создадат мал енергетски систем за сопствените потреби. Ова секако треба да е пропратено и со обезбедување енергетски ефикасна топлинска изолација на објектите коишто се загреваат.
На овој начин придонесуваме за севкупно намалување на потрошувачката, зачувување на животната средина, подобрување на личната удобност и животниот стандард, и што е најважно, придонесуваме за позитивни промени и навики во околината и општеството.
„Еко-Свест“ како центар за истражување и информирање за животната средина апелира на вклучување на секоја единка да инвестира во процесот на зачувување на животната средина и менување на навиките кои ќе доведат до поздрав живот за сите.
Во рамки на 20 годишнината од формирањето и работата на Еко-свест, вчеравечер во Скопје организиравме свечен настан. Одбележувањето на дваесет годишното постоење на организацијата беше под покровителство на Претседателот г. Стево Пендаровски.
Во своето обраќање, Претседателот Пендаровски ја потенцираше улогата на Еко-свест како една од водечките организации во државата во областа на заштитата на животната средина и јавното здравје, која 20 години успешно постои и предводи политики за одржлив развој, зелена трансформација на општеството, а активно се залага за намалување на последиците од климатските промени.
На свеченоста концептуално беше претставен и дел од работата на Еко-свест преку хронолошки историјат на бројните и значајни активности реализирани низ минатите две децении работа.
За долгогодишна посветеност и работа во унапредувањето на животната средина, природата, одржливиот развој, јавното здравје и објективното информирање на јавностата, со посебни благодарници беа наградени академик Владо Матевски, проф. д-р Трајче Стафилов, д-р Диме Меловски, проф. д-р Сашка Петрова, проф. д-р Драган Ѓорѓев и Ана Петрушева.
Еко-свест се заблагодарува на сите поранешни и сегашни соработници, пријатели, колеги, партнери и поддржувачи за досегашната соработка.
Директорката на Еко-свест, Ана Чоловиќ Лешоска во својот поздравен говор потенцираше дека работата во организацијата е всушност начин на живот за вработените. Тие несебично се трудат да придонесат во унапредувањето на заштитата на животната средина, подобрувањето на јавното здравје и еколошкиот активизам.
Во своето дводецениско работење, Еко-свест реализираше над 80 проекти, спроведе бројни кампањи кои досегнаа до над 1,2 милиони граѓани и издадовме над 100 релевантни публикации.
Како што порача и Претседателот Пендаровски, во годините кои следат нужно е максимално сериозно да се посветиме на зелената агенда и да ги постигнеме сите зацртани цели за чиста средина, здрави граѓани, енергетска и економска стабилност и одржливост, заштитена природа и див свет и циркуларна, наместо сега доминантната линеарна економија.
На 09 септември 2002 година е формиран Центарот за истражување и информирање во животната средина Еко-свест од Скопје.
Во минатите две децении активно работевме на одржливиот развој, заштитата на животната средина и поттикнувавме зелена трансформација на општеството.
Предизвиците и постигнувањата во минатите дваесет години активна работа се дополнителен мотив – во следниот период да постигнеме уште повеќе и заеднички да придонесме за поздрава и почиста животна средина и одржлив развој.
Септември е месецот на одбележување на нашиот роденден и 20 годишното постоење. Следете ги нашите социјални медиуми и веб страницата за настаните кои ги организираме во следните недели и за објавите со кои заеднички ќе се потсетиме на нашите постигнувања.
Најнови коментари